LAOAG CITY – Naarestar ti asawa ti nakabalud a dati a Presidente ti South Korea a ni Yoon Suk Yeol gapu kadagiti sangsangwen na a naruay a kaso, karaman ditoy ti panangmanipular ti stock ken panagpasuksuk.
Immunan a naglikudan ni dati a First lady Kim Keon Hee dagiti akusasyon kenkuana kabayatan ti namin-uppat a daras a pannakaisayangkat ti panagdengngeg idiay Seoul.
Nupay kasta, nangiparuk-at ti korte ti detention warrant gapu iti panagamak da a dadaelen ti dati a First lady dagiti ebidensya kontra kenkuana.
Ti South Korea ket addaan ti pakasaritaan dagiti dati a presidente a naibalud gapu iti nagduduma a kaso.
Nupay kasta, daytoy ti kaunaan a gundaway nga agpada ti dati a presidente ken dati a first lady a nabalud.
Maipalagip a naikkat iti puesto ni Yoon idi Abril ken naarestar manen idi Hulio kalpasan ti panangipatungpal daytoy ti apagbiit a martial law idi Disiembre ti napalabas a tawen.
