LAOAG CITY – Nagballigi dagiti kameng ti Criminal Investigation and Detection Group (CIDG) a nangtiliw ken ni Vivian Marie Wa-ay, agtawen ti 58, taga Baguio City ngem agdama nga agnanaed iti Barangay 3, Sta. Barbara, Sarrat, Ilocos Norte.
Natiliw ni Wa-ay babaen ti bileg ti maysa a warrant of arrest gapu iti kaso na nga Illegal recruitment nga inpila dagiti lima a nagbalin a biktima na nga agkalikagom koma a mapan agtrabaho idiay abroad.
Segun ken ni Wa-ay, umabot iti 150 ribo a pisos ti naala na amin kadagiti biktima na ken inpasingked na a nakasagana a mangisubli ti kwarta da.
Iti agdama, temporaryo a naipakustodyar iti Bureau of Jail Management and Penology (BJMP) ditoy ciudad ti Laoag ni Wa-ay.
Awan ti nairekomendar a pagpiyansa ni Wa-ay para koma iti temporaryo a pannakawaya-waya na.
Ni Wa-ay ket dati a konsehal idiay ili ti Sarrat.
