LAOAG CITY – Pormalen a nangipila ti Certificate of Candidacy ti dati a Mayor a ni Jeffrey Jubal Nalupta iti kina-Mayor iti siudad ti Batac idinto a nagpaidasig para iti Bise Mayor ni Sangguniang Panlungsod Member Bismark Quidang.
Malaksid iti daytoy, nangipila met ti kandidatura iti kina-Mayor ni Sangguniang Panlungsod Member Markee Chua idinto a nagpaidasig para iti Bise Mayor ni Mayor Albert Chua.
Maipalagip nga immunan a nangipila ti Certificate of Candidacy ti dati a Provincial Agriculturist Norma Lagmay para iti kina-Mayor iti siudad ti Batac kas independent candidate.
Kabayatanna, sinungbatan ni Konsehal Markee Chua ti isyu maipanggep iti sayungguseng a maipagarup nga ubing pay unay isuna nga agpaidasig iti kina-Mayor.
Inlawlawagna nga agtawen daytoyen iti 35 ken mamati isuna a dakkel ti advantage-na iti kinaubingna.
