LAOAG CITY – Nagballigi dagiti otoridad a nangtiliw iti dati a Municipal Agriculture Officer iti gobierno lokal iti ili ti Bangui.
Ti akusado ket agtawen ti 52, babai ken residente iti Barangay Abaca iti nadakamat nga ili.
Basar iti Philippine National Police iti ili ti Bangui, ti akusado ket maibilang kas Top 6 Most wanted person ditoy Ilocos Norte.
Natiliw ti akusado babaen ti bileg ti warrant of arrest gapu iti kaso na a malversation of public funds.
Nairekomendar ti 200 a ribo a pisos a piyansa ti akusado para iti temporaryo a pannakawaya-waya na.
Iti agdama, nagtalinaed ti akusado iti kustodyar ti Philippine National Police iti ili ti Bangui ken manamnama a maidatag daytoy iti korte a naggapwan ti warrant of arrest.
Maipalagip a kinumpirmaran ni Mayor Efren Cimatu iti ili ti Bangui a naikkat iti serbisyo ti dati a Municipal Agriculture Officer idi Setyembre 2023 gapu iti nasao a reklamo.
Namonganay ti reklamo dagiti mannalon kontra iti nasao nga akusado gapu ta maipagarop a saanna nga idandanun wenno itungtungpal amin dagiti ayuda wenno tulong a para kadakuada.
