LAOAG CITY – Sangsangkamaysa a nagdesisyon ti International Criminal Court (ICC) Trial Chamber III nga agtalinaed ni dati a Presidente Rodrigo Duterte iti pagbaludan.
Naiparuk-at ti nasao a desisyon kalpasan ti pannakaisayangkat ti maikatlo nga status conference iti kaso a crimes against humanity kontra iti dati a presidente.
Segun kadagiti trial judges, ngumatngato ti posibilidad a sumango ni Duterte iti panangusig ken mabalin a masentensyaan ti naunday a panawen.
Gapu iti daytoy, kuna ti chamber nga adda ti posibilidad na nga aglibas wenno makibiang ken agbalin a pangta iti imbestigasyon ken proceedings ti korte.
Inpetteng pay ti ICC a kalpasan a naisumitir ti prosecution ti listaan dagiti testigo ken ebidensya, naiparuk-at dagiti pakabigbigan dagiti testigo ken namnamaen a testimonya dagitoy.
Kuna ti Chamber, mabalin a manayunan ti posibilidad ti pannakibiang kadagiti testigo, direkta man wenno iti babaen ti pamilya wenno supporters ni Duterte iti Pilipinas.
Kabayatanna, uray nakapenpen pay ti desisyon iti fitness to stand trial ni Duterte, inbatad ti korte nga awan ti baro nga impormasyon dagiti report ti medical experts nga umdas tapno baliwan ti agdama a nakabaludan ni Duterte.
Agtalinaed iti ICC Detention Centre iti The Hague ni Duterte no sadinno a nakabalud sipud idi naarestar.
