LAOAG CITY – Pinadayawan ti Sangguniang Panlalawigan ni Mrs. Mildred Juan Albano-Fernando nga agtawen iti 70 gapu iti panagbalinna a boluntario a Barangay Health Worker iti ili ti Dingras iti sumurok nga uppat a dekada.
Inrugi ni Hernando ti boluntario a serbisiona kas Barangay Health Worker idi Enero 2, 1983 ken nagbalin a Presidente ti Ilocos Norte – Laoag City Federated Barangay Health Workers Association idi 1990.
Inbatadna a kalpasan ti tallo a dekada a panagserbina kas boluntario a Barangay Health Worker ket napan daytoy idiay Estados Unidos ken nagnaed iti maysa kadagiti annakna idiay Oregon.
Mainaig iti daytoy, nangputar ti maysa a resolusion ti Sangguniang Panlalawigan a mangipaay ti pammigbig iti nagbalin a serbisiona kas volunteer health worker iti probinsia ti Ilocos Norte.
Naammoan a kabayatan ti terminona kas Presidente ti asosasion ti Barangay Health Worker manipud idi 1990 agingga idi 2015, ti organisasionna ket nakaawat kadagiti adu a premio ken komendasion kas Outstanding Federation iti tawen a 1996 agingga 1999, Best Practice Office, ken kas Presidente ket napadawayan pay isuna kas Best Trainer of Barangay Health Workers idi 1994 ken Best Performing President of the Ilocos Norte – Laoag City Association of Barangay Health Workers.
Iti panagbitla ni Hernando, kunana a saan a nakaawat ti uray maysa a sentabo manipud iti gobierno idi rinugianna ti panagboluntario a panagtrabahona.
Nupay kasta, kunana, inlawlawagna a magustoanna ti agboluntario nga agtrabaho para iti probinsia.
Inpakaammona kas maysa nga ina kadagiti 11 nga annak ket naragsak isuna a makita nga amin dagitoy ket propesional iti baet nga isuna ket balo ti maysa a militar.
Inpasingked ni Hernando a ti panagboluntario ti nangisuro kenkuana ti kinapateg ti kaadda ti puso nga agserbi iti komunidad.
Innayonna nga idi panawenda ket awan pay ti honorarium para kadagiti Barangay Health Worker ngem ti panagserbi iti komunidad ti nangted kenkuana ti pudno a panagserbina kadagiti umili.
Kabayatanna, kunana a nupay idi pimmanaw iti pagilian ken nagtrabaho idiay Estados Unidos kas Caregiver ket ti boluntario a panagserbina kas Barangay Health Worker ti kailiwna unay.
