LAOAG CITY – Pormalen a nangipila ti Certificate of Candidacy ni Mrs. Norma Lagmay nga agpaidasig kas Mayor iti siudad ti Batac para iti 2025 Midterm Elections.
Segun kenkuana, mamati isuna nga umdas ti 44 a tawen a nagserbi daytoy iti gobierno a mangipaneknek a kabaelanna nga idaulo iti sibubukel a siudad.
Inbatadna nga iti kagudua iti biagna ket nagserbi daytoy iti pamilia Marcos no sadinno a nangrugi ti panagserbina iti publiko iti babaen ken ni dati a Presidente Ferdinand Marcos Sr., sinaruno ni dati a Gov. Elizabeth Marcos Keon, Presidente Ferdinand Marcos Jr., Sen. Imee Marcos, Cong. Angelo Marcos Barba ken Gov. Matthew Marcos Manotoc.
Inpannakkelna a babaen iti lideratona idi iti Provincial Agriculture Office ket karaman ti Ilocos Norte kas maysa kadagiti Top 10 Most Outstanding Rice Producing Provinces in the Philippines.
Inlawlawagna a ti nanggutigot kenkuana nga agpailayon kas Mayor ket ti kalikagumna nga ad-adda pay a dumur-as iti siudad ti Batac babaen iti pannakikammayetna kadagiti lider manipud kadagiti nagduduma a grupo ken sektor.
Babaen iti daytoy, kunana a maammoanna dagiti babassit agingga dadakkel a parikotda nga ikarigatanna nga ibirokan ti solusion dagitoy para iti pagnam-ayan dagiti naruay nga umili.
Naammoan nga independent candidate ni Lagmay para iti mapaspasangasangan nga eleksion inton sumaruno a tawen.
Maipalagip a nagretiro kas Provincial Agriculturist ni Lagmay idi 2021 ken maysa kadagiti nangputar iti Ilocos Norte Agriculture Fishery and Extension System nga umuna ditoy Pilipinas.
