LAOAG CITY – Nagpositibo ti naiyuswat a search warrant operation iti pagtaengan ni Mr. Jonathan Basuel, agtawen ti 35, awanan ti asawa, dati nga OFW, dati a kameng ti militar, negosyante ken taga Barangay Pug-os, Sinait, Ilocos Sur ngem agnanaed iti Camella Homes idiay Barangay 44, Zamboanga ditoy ciudad ti Laoag.
Nakumpiskar dagiti otoridad ti maysa a granada, 27 a bala ti 9MM, innem a bala ti kalibre 45, 10 a bala ti armalite ken maysa a bala ti MK4 a paltog.
Segun kenni Basuel, nalawag a planted dagiti naala nga ebidensya ken nakigtot idi adda ti naala a bala iti pagturturugan na gapo ta saan a naturog iti mismo a kwarto na.
Naamoan a dagiti dadduma a naala a bala ken naggapo kadagiti drawer ti kwarto na ken inpetteng na sakbay a nangrugi ti operasyon ken adda iti simrek iti kwarto na.
Immuna iti daytoy, kunana nga idi saan pay a nangrugi ti operasyon ket maipagarop a kinabil dagiti pulis isuna isut gapo na a nasugatan ti muging ken naperdi ti ridaw ti banyo da.
Kabayatanna, inbatad ni Police Supt. Dominic Guerrero, chief of police ti PNP-Laoag a nakaawat da ti report mainaig ti kaadda ti paltog ni Mr. Jonathan Basuel.
Inlawlawag ni Guerrero a basar iti informant ket dua wenno tallo ti paltog ni Basuel.
