LAOAG CITY – Inpeksa ni Professor Cielo Magno, dati nga Undersecretary ti Department of Finance, a kontra isuna iti araramiden ti Department of Finance (DOF) nga alaen ti sobra a pondo ti Philippine Health Insurance Corporation (PhilHealth).
Segun ken ni Magno, patienna a maikontra daytoy iti universal health care law a mangibagbaga a rumbeng laeng a mailatang ti pondo ti PhilHealth a mapalawa ti serbisio ti nadakamat a korporasion.
Kinunana, nga agbalbalin daytoy a pamaneknek iti kinakurang ti panangaramid ti PhilHealth iti trabahoda tapnu masigurado nga ad-adu kadagiti pilipino ti magungonaan kadagiti benpisio nga ipaayna.
Para ken ni Magno, ti pannakaisubli ti pondo ket maibilang kas “betrayal” iti karbengan dagiti Pilipino a maaddaan iti umno a serbisio ti salun-at.
Inbatadna a saan nga umdas ti benepisio nga ipaay ti PhilHealth nga imbes nga alaen ti Department of Finance, mausar ti pondo a mapalawa iti serbisio ti korporasion, pakairamanan ti pag-cover kadagiti benepisio dagiti outpatient wenno panangipababa iti premium a baybayadan dagiti Pilipino.
Innayonna a responsibilidad ti PhilHealth a siguraduen a mairehistro dagiti marigrigat, senior citizens, ken persons with disabilities (PWDs) a saan a makabayad iti premium.
Kas sungbat, plano ni Prof. Magno ken pakairamanan dagiti nagdumaduma a sektor dagiti doktor, health care providers, ken benepisiario ti mangipila ti kaso iti Korte Suprema tapno kuestionaren ti legalidad ti Department of Finance nga alaen ti pondo ti PhilHealth a maited kas pondo kadagiti dadduma a proyekto ti gobierno.
Kabayatanna, iti masungad a State of the Nation Address (SONA) ni Presidente Ferdinand “Bongbong” Marcos Jr., kayat ni Magno ti nalawag a programa ti presidente nangruna a kontra iti korapsion, kas iti isyu kadagiti Philippine Offshore Gaming Operators (POGO), peke a birth certificates, ken dadduma pay.
