LAOAG CITY – Agsagsaganan ti legal team ni dati a Presidente Rodrigo Duterte para iti umas-asideg a confirmation of charges hearing iti International Criminal Court idiay The Hague, Netherlands a maiwayat inton Septiembre 23.
Kinumpirmaran daytoy ni Vice President Sara Duterte iti nagbalin a panagbitlana iti panaguummong ti Filipino community idiay Kuwait.
Malaksid iti daytoy, inbutaktak ni Vice President Sara nga adda ti maysa pay a dokumento nga isagsagana ti defense team ngem saanda pay daytoy a dakdakamaten gapu ta saan pay a naipasa iti Korte.
Dinakamat ti Bise Presidente dagiti immuna nga addang ti defense team kas ti panangkwestionar iti hurisdiksion ti International Criminal Court ken ti panangkiddaw para iti temporario a pannakawaya-waya ti dati a Presidente.
Naikeddeng ti maminsan manen a panagsango iti International Criminal Court Pre-Trial Chamber 1 ti dati a Presidente inton sumaruno a bulan para iti confirmation of charges mainaig iti kaso a crimes against humanity gapu iti maipagarup a panangpapatay iti babaen ti war on drugs.
