LAOAG CITY – Suportaran ti Department of Health (DOH) ti nailungalong a maipangato ti excise tax iti sweetened beverages tapno makissayan ti panagkonsumo ti nasasam-it a mainom ken makatulong iti pananglapped dagiti sakit nga adda ti pakainaigan daytoy.
Inlungalong ti Department of Finance (DOF) nga ipangato manipod iti P6 iti kada litro mapagbalin a P20 ti kada litro ti buwis dagiti mainom nga agus-usar ti caloric sweeteners, ken manipod iti P12 mapagbalin a P40 ti kada litro para iti agus-usar ti high-fructose corn syrup.
Karaman pay iti nailungalong ti tinawen a 5% indexation ti buwis ken panangikkat ti tax exemption iti sumagmamano a natural fruit ken vegetable juices, kasta pay ti edible ices kas ti ice cream ken frozen yogurt.
Segun ken ni DOH Assistant Secretary Lester Tan, ti nangato a konsumo ti nasasam-it a mainom ket mangpakaro iti risgo ti obesity, diabetes ken cardiovascular diseases, ken mabalin pay a maaddaan ti adda ti pakainaigan ti sumagmamano a klase ti sakit a cancer.
Inbatad na a basar iti 2023 Global Burden of Disease study, mapatta-patta a 3,537 a pannakatay ken 143,653 a disability-adjusted life years iti Pilipinas ti maikonkonektar iti nangato a panagkonsumo ti fizzy drinks.
Inlawlawag met ti Department of Health a saanna a kayat a sawen a direkta a rason ti sweetened beverages ti kada kaso, ngem ipakpakita ti datos nga adda ti marukrukod ken maliklikan ti nangato a panagkonsumo iti daytoy iti disease burden ti pagilian.
Inlungalong pay ti DOH a 50% ti maukkon a mapastrek manipod iti nangato a buwis ket mailatang iti Philippine Health Insurance Corporation para iti premium financing iti babaen ti Universal Health Care.
