LAOAG CITY – Ginutigot ti Department of Justice ti publiko a makipagmaymaysa iti pananglaban iti online sexual abuse kadagiti agtutubo.
Daytoy ket kalpasan a ti pannaka-ispal dagiti uppat nga agtutubo kabayatan ti agtultuloy a kampania dagiti otoridad kontra iti online sexual abuse ken pananggundaway kadagiti ubbing.
Sakbay iti daytoy ket immuna nga inaresto dagiti otoridad ti agtawen ti 32 a babai idiay Misamis Oriental a maipagarup nga inusarna ti social media account-na a mangitukon kadagiti ubbing nga agaramid kadagiti saan a maiparbeng a banag iti sango ti camera kasukat ti kuarta.
Malaksid kadagiti uppat nga agtutubo a biktima, tallo pay nga ubbing a maibilang nga agpegpeggad ti inispal dagiti otoridad babaen ti tulong ti Women and Children Protection Center-Mindanao Field Unit.
Segun kenni Department of Justice (DOJ) ken Inter-Agency Council Against Trafficking (IACAT) In-Charge Undersecretary Nicholas Felix Ty, masapul ti panagtitinnulong tapno masalakniban dagiti ubbing manipud iti cyberspace.
Malaksid iti daytoy, inallukoy ti ahensya ti publiko a labanan ti online sexual abuse tapno awanen ti agtutubo nga agbalin a biktima.
