LAOAG CITY – Inpakaammo ni P/Cpt. Elison Pasamonte, Hepe ti Badoc Municipal Police Station nga addan ti lead a sursuroten dagiti otoridad iti pannakatay ti maysa a balikbayan iti Barangay Aring iti ili ti Badoc.
Nupay kasta, inlawlawagna a saan pay laeng a mabalin nga ibuksilan dagiti nakalapda nga impormasion tapno saan a maapektaran ti iwaywayatda nga imbestigasion.
Inbatad ni P/Cpt. Pasamonte a planado ti napasamak iti biktima gapu iti nadalus a pannakaaramid ti krimen.
Kunana nga adda ti lima a tama ti bala ti paltog ti biktima no sadinno a natamaan ti bakurong ken sakana babaen ti calibre 45 a paltog.
Inlawlawagna nga awan met ti nakairamramanan ti biktima iti barangay wenno iti ili ti Badoc.
Maipalagip a kabayatan ti panag-walking ti biktima kaduana ti asawana ket kellaat lattan a pinaltu-pinaltogan dagiti saan pay a nabigbig a suspek.
