LAOAG CITY – Inbilin ti Department of Education (DepEd) ti amin a pampubliko a pagadalan ditoy pagilian a mangisayangkat ti simple ken nalaka a graduation ken moving-up ceremonies para iti School Year 2025–2026 kas sungbat iti ngumatngato a gastosen iti transportasion ken presio ti magatgatang.
Iti babaen ti Department of Education Memorandum No. 015, s. 2026, maipawil ti aniaman a koleksion ti fees wenno kontribusion manipud kadagiti estudiante para iti end-of-school-year rites.
Inbatad ni Education Secretary Sonny Angara, gagem daytoy a mapalag-an ti ibakbaklay a gastosen ti pamilia.
Naibilin pay a liklikan ti nangina a venues ken aramiden nga inklusibo dagiti seremonia idinto a mabalin nga usaren ti school Maintenance and Other Operating Expenses wenno MOOE para iti magastos.
Mapatta-patta a 1.9 milyon a Grade 6 ken 1.8 milyon a Grade 12 learners ti agturpos ita a tawen ken naikeddeng dagiti seremonia inton Marso 30 wenno 31, 2026.
