LAOAG CITY – Pappapigsaen ti DepEd Laoag City dagiti partnership initiatives tapno masigurado nga agtultuloy ti edukasyon dagiti estudyante babaen dagiti nagduduma a klase ti panagadal.
Daytoy ket paset iti panagsagana ti national government iti new normal ti edukasyon.
Basar iti survey nga insayangkat ti DepEd Laoag seknan iti panagpili dagiti nagannak iti klase ti panagadal dagiti annak da para ita school year, 34% ti nangpili ti online learning, 28% iti modular learning, 22% iti blended learning pakairananan ti face-to-face, online ken modular, 9% iti telebisyon ken 5% iti radyo.
Gapu iti daytoy, nangisayangkat ti DepEd Laoag ti fundraising project nga “imSAFEnow!” wenno ti Investing and Mobilizing Support for Accesible and Future-Ready Education.”
Gagem ti nasao a proyekto ket tapno agkiddaw iti suporta dagiti nagduduma a stakeholders nga agraise ti fund para iti pannakaibstallar ti VSAT Satellite Communication System a mangbenepisyar dagiti nagduduma a pagadalan ken barangay nga awanan ti internet connection.
Malaksid iti daytoy, makikokoordinar ti DepEd Laoag kadagiti television ken radio broadcasting companies para iti TeleKasyon ken RadyoKasyon tapno masuportaran dagiti awanan ti online access.
Kabayatanna, maisagsagana pay dagiti modules ken instructional materials para iti nagduduma a learning modalities babaen ti Curriculum and Instruction Division. Babaen iti suporta dagiti stakeholders, mangnamnama ti DepEd Laoag nga idadauloan ni Schools Division Superintendent Mrs. Vilma Eda nga awan ti mabati nga estudyante nga agadal iti baet ti COVID-19 pandemic
