LAOAG CITY – Nakipagpaset iti local school board meeting ti Department of Education (DepEd) iti Laoag Division ni Mayor Michael Marcos-Keon ditoy ciudad ti Laoag.
Ditoy a napagsasaritaan dagiti maseknan ti plano da a panakainayun dagiti dadduma a pagadalan ditoy ciudad a pakaipatungpalan ti face-to-face class para iti sumaruno nga school year.
Immunan a dineterminar ti Department of Health (DoH) dagiti 90 a pagadalan iti intero a pagilyan a pakairamanan dagiti sumagmamano a pagadalan ditoy probinsya a mangisayangkat ti face-to-face class para iti sumaruno nga school year.
Nupay kasta, inlawlawag ni City Schools Division Supt. Mrs. Vilma Eda a bassit laeng ti nairaman a pagadalan ditoy ciudad gapu ta idi nagipasa da ti listaan ket ado pay laeng ti kaso ti covid-19 ditoy ciudad.
Innayon na a gapu ta bimmaban ti kaso ti covid-19 ditoy ciudad ti Laoag ket kalikagom da a manayunan dagiti pagadalan ditoy ciudad a pakaipatungpalan ti face-to-face class.
