LAOAG CITY – Inlawlawag ni Municipal Treasurer Adela Rebolledo iti ili ti Paoay a nagkiddaw ti Department of Education ti oval a mausar kadagiti pagadalan ti Paoay Sports Center.
Segun kenkuana, nagkiddaw ti departamento a bayadan pay laeng iti lokal a gobierno iti ili ti Paoay ti nadakamat a lote babaen iti general fund daytoy.
Inbatadna nga iti kada tawen ket adda ti nailatang iti Special Education Fund nga isu ti maibayad iti napagkautan a pundo manipod iti general fund.
Inlawlawagna nga adda ti 2.1 a milyon a pisos ti naiyalokar nga Special Education Fund ita a tawen no sadino basbassit nga amang no idasig iti nasurok 4 a milyon a pisos iti napalabas a tawen.
Mainaig iti daytoy, kuna ni Rebolledon nga adda ti insingasing ni Dr. Jeric Gabriela maipapan iti panaggatang ti libro para kadagiti estudiante a maibilang nga slow learners kas napagnunumoada iti Regional Office.
Inpalgakna a daytoy ket kalpasan a nadlaw ti Department of Education a masapol a matutukan dagiti maseknan nga agad-adal iti panagbasa ken panagkuntar.
Kabayatanna, kalikagum ni Vice Mayor Ferdinand Ignacio iti nasao nga ili a matratar a naimbag dagiti mailunglungalong iti konseho sakbay a naan-anay a maaprobaran tapno maammoan dagiti rumbeng a pakaipapanan dagiti pundo a maiparuk-at manipod iti lokal a gobierno.
