LAOAG CITY-Inlawlawag ni Atty. Omar Sema miembro ken Deputy Speaker ti Bangsamoro Transition Authority – Parliament a respetaren da dagiti inpablaak ni dati a Presidente Rodrigo Roa Duterte ngem saan da nga umannugot iti daytoy.
Daytoy ket seknan pay laeng ti inpablaak ni dati a Pres. Duterte a kalikagomna a maisina ti Minadanao iti pagilyan a Pilipinas.
Segun ken ni Sema, masapol nga awaten no naggapuan daytoy nga statement ni dati a Presidente.
Mamati isuna nga adda pakainaigan daytoy iti mailunglungalong a pannaka-amendar ti 1987 Philippine Constitution .
Ti Moro National Liberation Front (MNLF) ken Moro Islamic Liberation Front (MILF) ket adda katulagan da iti national government a nangrugi idi administrasyon ni dati a Pres. Ferdinand Marcos Sr. idi 1976, napasarunwan idi 1996 iti administrasyon ni dati a Pres. Fidel Ramos, bayat a ti Moro Islamic Liberation Front ket iti administrasyon ni dati a Pres. Benigno Aquino III.
Ti Bangsamoro Autonomous Region in Muslim Mindanao ket addaan iti kabukodan a pagalagadan.
Inpaganetget ni Sema nga awan ti aniaman a basaran tapno maipatungpal ti panakawatak ti pagilyan a Pilipinas ken awan ti aniaman a probisyon a nakailanad iti constitution a mabalin a maisina ti maysa a nasion.
Kunana a no maisina ti Mindanao iti pagilyan ket saan nga umasping iti penal code ken mabalin a punishable by law daytoy.
Patien na a ti kangrunaan a rason ket gapu iti Charter Change no sadinno nga usarenda ti people’s initiative.
Imbatad ni Sema a mabalin da met a mapagsaritaan a nasayaat daytoy nga isyu tapno ti kasta ket saanen a dumaakkel pay ti isyu seknan ti people’s initiative.
Ngem inpettengna nga adda posibilidad a maakseptar ti amin ti people’s initiative no la ketdi dumalan daytoy iti umiso a wagas.
Kunana nga agpapan ita ket awan pay ti nabasa na a petisyon seknan ti people’s initiative isu a saan na pay maikkan ti naan-anay a komento daytoy.
Kabayatanna, maragsakan pay ni Sema gapu ta adu dagiti naubraanen ni Presidente Bong Bong Marcos Jr. no sadinno nga inpaanamnama na pay ti suporta na iti amin a vision ti Presidente.
