LAOAG CITY – Kinumpirmaran ti Department of Foreign Affairs nga addan ti 4 a Pilipino a nasugatan idiay Israel kalpasan ti retaliatory airstrikes ti Iran.
Malaksid kadagiti nasugatan a Pilipino ket adda pay ti maysa a pinay a temporaryo nga agnanaed iti maysa nga hotel kalpasan a nadadael ti pagnanaedan na manipod iti panangipabanto ti missile ti Iran.
Saan paylaeng a nangiparuk-at ti naan-anay a detalye ti Department of Foreign Affairs kangrunaan na ti pakabigbigan dagiti apektado a Pilipino iti mapaspasamak a riribok iti nagbaetan ti Israel ken Iran.
Immunan nga inrakurak ti Department of Migrant Workers (DMW) a naka-heightened alert amin nga opisina da iti intero a Middle East bayat nga agtultuloy ti tensyon iti nagbaetan ti Israel ken Iran.
Inbatad ni Department of Migrant Workers Undersecretary Bernard Olalia a ti direktiba ket naggapo ken ni Presidente Ferdinand “Bongbong” Marcos Jr. ken Department of Migrant Workers Secretary Hans Leo Cacdac.
Segun ken ni Olalia, amin a front offices kangrunaan na iti Migrant Offices iti Israel, Jordan, Lebanon ken dadduma pay a pagilian iti Middle East ket naikabilen iti heightened-alert gapu ta isuda ti apektado iti riribok.
Innayon ni Olalia a nakasagana ti Department of Migrant Workers ken Overseas Workers Welfare Administration no bilang kumaro ti riribok ken lumawa pay ti regional conflict
iti nadakamat a pagilian.
