LAOAG CITY – Inlawlawag ti Department of the Interior and Local Government (DILG) a ti saan a panangarestar ken ni Senador Ronald ”Bato” dela Rosa ket saan a gapu iti kinakurang ti panangikagumaan nga ipatungpal ti linteg no diket maiyataday iti maipatpatungpal a legal a proseso.
Basar iti Department of the Interior and Local Government, ti nagbalin a nagibasaran ti ahensia ket ti Section 17 ti Philippine Act on Crimes Against International Humanitarian Law, Genocide, and Other Crimes Against Humanity a dinakamat pay ti Department of Justice (DOJ).
Iti babaen daytoy a linteg, mabalin nga isuko ti maysa nga indibidual iti International Criminal Court (ICC) wenno tingitingen daytoy iti lokal a korte iti Pilipinas no adda ti maiyannatop a warrant mainaig iti crimes against humanity.
Inpetteng ti Department of the Interior and Local Government nga inbilin ni Presidente Ferdinand Marcos Jr. dagiti maseknan nga ahensia pakairamanan ti Philippine National Police (PNP) nga iyuray pay laeng ti agbalin a desision ti Korte Suprema sakbay a mangiwayat ti aniaman a tignay no awan met ti pammilin manipud iti korte ti pagilian.
Immunan nga inrakurak ni Justice Secretary Fredderick Vida nga awan ti inparuk-at a manhunt order kontra ken ni Dela Rosa.
Inpaganetget pay ti Department of the Interior and Local Government a ti addangda ket saan a ti kinakurang ti tignay no diket panagtungpal laeng iti Konstitusion, due process ken rule of law ti Pilipinas.
