LAOAG CITY – Inbatad ni Atty. Neri Javier Colmenares nga arigna iturturong ni Vice President Sara Duterte ti atension ti publiko iti sabali nga isyu tapnu saanna a masungbatan no ana dagiti nagastuanna ti P125-M a confidential funds.
Kinuna ni Atty. Colmenares a masansan nga agus-usar ti Bise Presidente iti diversionary tactics tapno maiturong ti atension iti sabali nga isyu.
Kwinestiunaran pay ti abogado no apay a saan masungbatan ti Bise Presidente ti saludsod no kasanona a nagastos ti P125 million pesos a confidential funds.
Mainaig iti daytoy, kunana a kas maysa nga abogado ket nasken nga ammona a kasapulan latta ti mangipaay ti ebidensia no ana dagiti naggastuan iti confidential funds uray saanen a kiddawen ti Commission on Audit (COA).
Kabayatanna, mamati ni Colmenares a no saan a sungbatan ni VP Duterte dagiti salusod maipanggep iti mapapati korupsion ti opisina na ket mabalin daytoy a mangitunda ti kaso kenkuana a graft and corruption.
