LAOAG CITY – Isagsaganan ti Department of Migrant Workers (DMW) ti pannakapagawid dagiti 220 a Filipino detainees a naipaayan ti pardon ti gobyerno ti United Arab Emirates (UAE).
Inbatad ti Department of Migrant Workers a maiyal-alisto ti pannakapagawid dagiti overseas Filipino workers (OFWs) a naipaayan ti pardon iti selebrasyon ti maika-53 a National Day idiay United Arab Emirates.
Immunan nga inrakurak ni Presidente Ferdinand Marcos Jr. ti pannakaipaay ti pardon kadagiti maseknan no sadinno nga adda ti pakabuklan a 363 ti bilang dagiti napakawan nga Overseas Filipio Workers idi 2024, karaman dagiti naiparuk-at idi Eid al-Adha.
Kuna ti Department of Migrant Workers a ti nasao nga addang ket mangipaneknek iti natibker a relasyon iti nagbaetan ti Pilipinas ken United Arab Emirates nga ad-adda pay a napapigsa iti pannakitaripnong ni Presidente Marcos Jr. ken ni United Arab Emirates President Sheikh Mohamed Bin Zayed Al Nahyan idi Nobyembre 2024.
