LAOAG CITY – Bantayan ti Department of Migrant Workers (DMW) dagiti online postings dagiti bakante a trabaho kalpasan a nagkiddaw ti tulong iti gobierno ti nasurok 200 a Pilipino a narecruit nga agtrabaho kadagiti scam farm iti Myanmar ken kayatdan ti agawid.
Segun iti ahensya, naiget ti panangmonitor ti DMW kadagiti online postings dagiti package tour ken job opportunities a maibagbaga a masarakan idiay Thailand, Cambodia, Laos, ken Myanmar.
Naipadamag nga inikkaten dagiti otoridad ti agingga iti 17,000 a post a mainaig iti illegal recruitment ken peke a job offer manipud iti nagduduma a social media platform.
Makikokoordinar met ti DMW ken ti Department of Information and Communications Technology (DICT) kadagiti plataporma a kas iti Facebook ken TikTok, ken nangipila metten ti ahensia iti kaso kontra kadagiti illegal recruiter.
Pinalagipan manen ti DMW dagiti kayatda ti agtrabaho iti ballasiw-taaw nga agannad no agsapsapulda iti trabaho, nangruna ta adda dagiti recruiter nga ummuna nga ipanda dagiti biktimada iti ballasiw-taaw sakbay nga ipanda ida iti pudno a destinasionda.
Nagballaag pay ti ahensia kadagiti recruiter nga awan ti DMW authorization a mangisayangkat iti recruitment ken deployment dagiti Pilipino a trabahador iti ballasiw-taaw.
