LAOAG CITY – Inpasigurado ni Presidente Ferdinand Marcos Jr. nga awan ti puersa ti gobierno ti karaman iti naipadamag a serye ti panagpinnutok ti paltog iti Senado idi rabii.
Segun iti Presidente, insigida a nakikoordinar daytoy ken ni Department of the Interior and Local Government Secretary Jonvic Remulla tapno mapan nga insigida iti lugar.
Inbatadna a kinasaritana pay ni National Bureau of Investigation Director Melvin Matibag tapno siguradoen no adda ti kameng ti ahensia a simrek iti Senado nga insigida a naglikudan ti nasao nga ahensia.
Inlawlawagna a dagiti laeng lehitimo a security forces ti adda iti uneg ti Senado pakairamanan ti Philippine National Police (PNP), Philippine Marines ken Office of the Senate Sergeant-at-Arms (OSAA).
Naiget a naglikudan ti Presidente nga adda ti aniaman a pammilin nga arestaren ni Senador Ronald ”Bato” dela Rosa.
Kunana a manarimaan ti panangimbestigar dagiti otoridad ti insidente babaen ti Close Circuit Television footage tapno maduktalan no asino dagiti adda iti likudan ti riribok.
Nagpanawagan ti Presidente iti publiko nga agtalinaed a kalmado kabayatan nga agtultuloy ti imbestigasion ti Senado ken Philippine National police tapno maammoan ti sibubukel a kinapudno iti napasamak.
