LAOAG CITY – Inpasigurad ti gobierno ti dagus ken sibubukel a suporta para kadagiti 112 nga Overseas Filipino Workers (OFWs) ken dagiti dependent da a nagawid iti pagilian manipod iti Dubai, United Arab Emirates, iti babaen ti panangipaay ti  comprehensive assistance package apaman nagdisso dagitoy iti erupuerto.
Iti napagtipon a pwersa ti Overseas Workers Welfare Administration (OWWA) ken ti Department of Migrant Workers (DMW), dagus da a sinarabo ken inasikaso dagiti Pilipino a nakalugan ti Emirates Flight EK334.
Manipod iti erupuerto, natalged a naiyakar dagiti pasahero iti maysa nga holding area iti pasilidad ti DTI-PTTC tapno matulungan dagitoy kadagiti bagahe da ken dumalan da iti inisyal a panagiproseso.
Basar iti report ti ahensya, naipaayan dagiti nagawid a Pilipino ti special financial assistance karaman ti libre a taraon kabayatan ti panagur-uray da iti lugar.
Tapno masigurado a natalged ken naurnus ti panagawid dagiti Overseas Filipino Workers iti bukod da a pamilya, nangilatang pay ti gobierno ti temporary accommodation ken transport assistance.
Karaman ditoy ti panangasikaso kadagiti koneksyon a biyahe para kadagiti agnanaed iti Visayas ken Mindanao.
Kabayatanna, land travel met ti naisagana para kadagiti biyahero nga agawid iti Metro Manila, CALABARZON, ken Central Luzon.
Inlawlawag ti Overseas Workers Welfare Administration a ti nalawa a panangipaay ti tulong ti gobierno ket naipalaon iti whole-of-government approach ti agdama nga administrasyon.
Iti agdama, agtultuloy ti panagmonitor dagiti ahensya tapno mabayabay dagiti Overseas Filipino Workers agingga a makaawid da kadagiti bukod da a probinsya.
