LAOAG CITY – Inlawlawag ni Defense Secretary Gilberto “Gibo” Teodoro Jr. ti rakurakna nga agikkat iti responsibilidad dagiti opisial ti gobierno a saan a mangsupsuporta iti panangilaban ti pagilian iti West Philippine Sea (WPS).
Inpetteng ti sekretario a saan a mabalin a piliten nga ag-resign ti maysa nga opisial gapu laeng iti bukudna nga opinyon wenno pammati, nasken nga adda ti panaglabsing iti linteg wenno pagannurotan.
Inpaganetgetna a ti pagannurotan iti West Philippine Sea ket maiyallubog iti Administrative Order 29 series of 2012 a mangikeddeng kadagiti maritime area iti laud a paset ti pagilian kas West Philippine Sea isu a karaman daytoy iti linteg ti pagilian.
Kuna ni Teodoro ti amin nga opisial ti gobierno ket nagsapata a sumurot ken mangilaban iti Konstitusion ken kadagiti linteg ti Pilipinas.
Mainaig iti daytoy, kuna ti Department of National Defense chief a no ti maysa nga opisial ket saan a kumanunong iti opisial a panangilaban ti Pilipinas, addaanda ti dua a legal nga opsyon: Mabalinda nga iyuli iti korte ti banag tapno ideklarar a mailabsing iti Konstitusion ti nasao a linteg wenno pagannurotan ngem agingga nga awan ti desision ti korte, obligado dagitoy a sumurot iti linteg.
