LAOAG CITY – Target ti Philippine Charity Sweepstakes Office (PCSO) nga iraman iti medical assistance ti panagbayad iti professional fee dagiti doktor.
Segun ken ni Philippine Charity Sweepstakes Office General Manager Mel Robles, saan met a buo no di ket paset laeng iti professional fee ti doktor ti ad-adalen iti grupoda nga iraman iti medical assistance.
Inbatad ni Robles, nakadepende daytoy no kabaelan ti budget ti Philippine Charity Sweepstakes Office.
Kunana nga arapaap ti Philippine Charity Sweepstakes Office nga awan koman ti bayadan dagiti pasiente.
Inlawlawag ni Robles no bilang saan a dagus a mabayadan ti doktor, mabalin met ti promisory note.
Inpalgakna nga ikarigatan ti Philippine Charity Sweepstakes Office a dagus nga iruar ti guarantee letter tapno mabayadan dagiti doktor.
Immunan a nagpanawagan ni House Committee on Appropriations Chairman ken Ako-Bicol Party-list Rep. Zaldy Co a baklayen ti bayad iti doktor para kadagiti marigrigat a pasiente.
