LAOAG CITY – Inpasigurado ti Department of Energy (DOE) ti naiget a panagbantay iti suplay ti kuriente iti intero a pagilian kagiddan ti yellow alert status nga inpangato ti National Grid Corporation of the Philippines iti Luzon ken Visayas grid gapu iti bassit a reserba ti kuriente.
Inbatad ni Sec. Sharon Garin, nangipatungpalen ti ahensia kadagiti addang tapno masigurado a mapagtalinaed ti stability ti power system ken maliklikan ti aniaman a posible a pannakaapektar iti suplay ti kuriente.
Inbilin ti Department of Energy ti National Grid Corporation of the Philippines, dagiti generation companies ken system operators nga iyalisto ti pannakatarimaan dagiti apektado a power plants a nangitunda ti kinakurang iti suplay.
Immuna iti daytoy, pinagtignay met ti Department of Energy ti LNGPH consortium a bukbuklen ti San Miguel Global Power, AboitizPower ken Meralco PowerGen kaduana ti dadduma pay nga stakeholders tapno insigida a maiwayat ti restoration dagiti planta iti Luzon ken Visayas.
Gagem dagitoy nga addang a mapatibker ti suplay ti kuriente ken maliklikan ti epekto daytoy kadagiti konsyumer.
