LAOAG CITY – Manamnama a mangipatulod ti Department of Health (DOH) ti healthcare workers idiay Jamaica.
Daytoy ket kageddan ti panagpirma ti Department of Health ken Ministry of Health ti Jamaica iti maysa a Memorandum Of Understanding (MOU) a mangipalubos iti panangipatulod kadagiti Pilipino nga healthcare workers idiay Jamaica para iti capacity building.
Saan met a dinakamat ti Department of Health no kasano ti kaadu nga healthcare workers ti maipatulod idiay Jamaica.
Napirmaan ti nasao a katulagan da Philippine Health Secretary Teodoro Herbosa ken Jamaican Health Minister Christopher Tufton idiay Kingston, Jamaica.
Iti babaen ti katulagan, maaddaan ti panagsinnukat ti ammo ti dua a pagilian iti benneg ti biotechnology ken epidemiology pakairamanan ti panangsolbar iti health workforce sustainability.
Kabayatanna, ikagkagumaan ni Sec. Herbosa iti alisto a panangipatulod dagiti Pilipino nga healthcare workers idiay Jamaica a gagem a papigsaen pay ti kapasidadda iti babaen ti exposure iti healthcare system ti Jamaica kabayatan a matultulungan ti health workforce shortage ditoy pagilian.
