LAOAG CITY – Saan pay laeng a mangipatungpal ti gobierno ti lockdown ditoy pagilian gapu iti monkeypox.
Segun ken ni Department of Health (DOH) Secretary Teodoro Herbosa, basar kadagiti datos nga iggemda iti agdama, saan pay a kasapulan ti lockdown. Awan pay ti planoda nga imandar ti panagusar ti face mask wenno face shields.
Inbatadna nga iti baet ti agtultuloy a community transmission ket balligi a makonkontrol ti Department of Health ti Mpox Clade II.
Inlawlawagna a saan a kas ti COVID-19 nga airborne, ti mpox Clade II ket maiyakar laeng babaen iti close ken intimate, skin-to-skin contact ken babaen iti panangiggem kadagiti banag a naiggaman dagiti pasiente nga addaan ti aktibo nga skin lesions no sadinno a saan a kas kaalisto ti COVID-19 ti panagwaras ti monkeypox.
Mainaig iti daytoy, inpasingked ti Department of Health a matay ti virus iti babaen ti panagbuggo usar ti sabon ken danum wenno panagusar ti alcohol sanitizers.
Inadmitir ti Department of Health a namnamaenda ti ad-adu pay nga agpositibo iti monkeypox gapu ta inpayal-alistoda pay ti panagtingiting.
Nupay kasta, posible a mangipatungpal ti Department of Health ken dagiti local government ti containment iti kanito nga adda ti mairekord nga imported a kaso ti mpox Clade Ib.
Kabayatanna, mabalin pay ikonsiderar ti Department of Health iti panagsubli ti Inter-Agency Task Force (IATF) apaman nga adda ti community transmission ti monkeypox Clade Ib.
