LAOAG CITY – Bassit pay a pasensya.
Daytoy ti panawagan iti publiko ti Department of Justice maipapan iti kaso da dati a Congressman Arnolfo Teves Jr. ken ni dati a Bureau of Corrections chief Gerald Bantag.
Arig inadmitir ni Department of Justice Spokesperson Mico Clavano ti nabayag a panagtalidtied ti kaso da Teves ken Bantag.
Kunana a kalikagum laeng ti ahensia a maipasigurado a sumursurot daytoy iti umiso a proseso ken maipaay kadagiti respondent ti due process tapno saan a makitaan ti biddot ti gobierno.
Inbatadna nga iti kaso ni Teves, iyur-uray pay laeng ti Philippine government ti desision ti korte iti Timor Leste pakaseknan iti panagkiddawda ti extradition kontra ken ni Teves.
Inlawlawagna nga iti met kaso ni Bantag ket agtultuloy latta ti manhunt operation.
Maipalagip a ni Teves ket akusado iti panangpapatay ken ni Negros Oriental Governor Roel Degamo ken siam a dadduma pay idinto a ni Bantag ket maibilang a mastermind iti panangpatay ken ni radio broadcaster a ni Percy Lapid.
