LAOAG CITY – Maysa a doktor idiay Nigeria ti nakagun-od ti Guinness World Record babaen iti maysa a 10,814.5-square-foot a drawing a mangselselebrar iti kultura iti pagilianda.
In-drawing ni Fola David-Tolaram ti “The Unity of Diversity” babaen iti waterproof markers iti maysa a nakadakdakkel a canvas iti maysa a 5,000 seater stadium.
Gapu iti daytoy, nakaawat daytoy ti world record title a “World’s Largest Drawing by an Individual.”
Naammoan a ti nasao a drawing ket mangipakpakita ti mapa ti Nigeria nga adda dagiti ladawan dagiti nalalatak a Nigerians ken dagiti simbolo dagiti kultura a naggapu kadagiti nagduduma a rehion iti pagilianda.
