Kinumpirmaran ni Assistant Ombudsman Mico Clavano nga opisial a naawat ti Office of the Ombudsman ti partial committee report manipud iti opisina ni dati a Senate Blue Ribbon Committee Chairperson Panfilo “Ping” Lacson.
Ti naglaon ti report iti resulta ti imbestigasion kadagiti anomalous flood control projects ditoy pagilian.
Segun kenni Clavano, dagus a maipatulod ti impormasion a linaon ti report kadagiti case teams a mangasikaso kadagiti nagduduma a kaso ti flood control para iti naan-anay a panaganalisar ken insigida nga aksion dagitoy.
Nainaganan ti report isuda Senador Francis Escudero, Joel Villanueva, ken Jinggoy Estrada.
Karaman pay a nainaganan isuda dati a Senador Ramon “Bong” Revilla Jr., Leyte Rep. Martin Romualdez, ken dati a House Appropriations Committee Chair Rep. Elizaldy Co.
Inrekomendar ti komite a dagiti nadakamat ket maipadalan iti umuna nga imbestigasion, fact-finding investigation, wenno case buildup. Daytoy ket gapu iti posible a panaglabsing iti linteg kas iti direct bribery, anti-graft ken corrupt practices, ken plunder.
