LAOAG CITY – Ginutigot ni Mr. Justine Paul Marbella, ti Information Officer iti Dept. of Labor and Employement (DOLE) Region 1 dagiti agbirbirok ti trabaho a makipagpaset iti Job Fair intono Hunyo 12 a maangay iti Robinsons Mall iti ili ti San Nicolas.
Segun kenni Marbella, umabot iti 1,257 a job vacancies ti mabalin a pagpilyan dagiti agbirbirok ti trabaho rason a magutgutigot dagitoy, saan laeng a taga Ilocos Norte no diket uray dagiti kabangibang a probinsya.
Kunana nga intero a Rehiyon Uno ket umabot iti nasurok 24 a ribo a job vacancies ti maidiaya ken 160 nga employers ti makipartisipar ken mabalin pay nga agrehistro dagiti dadduma a mangayat.
Kunana a karaman kadagiti Top 5 a kaadoan a job vacancies ket ti Production Operators kadagiti manufacturing company nga umabot iti sangaribo; Customer Service Representatives; Micro-Finance Officer; Quality Assurance Inspectors ken iti Construction Industry.
Inlawlawag na a maysa kadagiti kangrunaan nga iyunay-unay ti ahensya kadagiti makipartispar nga employers ket ti ado ti maala a dagus wenno hire on the spot.
Ti Ilocos Norte ket maysa laeng kadagiti walo a venue iti Region 1 para iti Kalayaan Job Fair ken mangrugi iti alas-otso iti bigat agingga iti alas-singko iti malem.
Mainaig iti daytoy, kunana a nagpatingga idi kalman, Hunyo 7, ket addan ti 700 a nag-pre register iti Rehiyon Uno no sadinno a ditoy Ilocos Norte ket 56 pay laeng.
