LAOAG CITY – Ikonsiderar ti Department of Transportation (DOTr) ti pannakabalbaliw ti disenyo ti bike lane iti By-pass road ditoy ciudad ti Laoag.
Daytoy ti inrakurak ni Mr. Eldon Dionisio, ti Project manager of Active Transport Office iti Department of Transportation kalpasan ti panangimbitar kadakuada ti konseho ditoy ciudad.
Inlawlawag ni Dionisio nga iti baet nga ikonsiderar da ti pannakabalbaliw ti disenyo ti bike lane ket masapol koma nga agtalinaed a class 1 tapno masigurado ti kinatalged dagiti siklista ken magmagna iti lugar.
Innayon na a pagsasaritaan da a naimbag daytoy a banag kadwa da ti City Engineering Office.
Inpasigurado pay ni Dionisio a no bilang mabalbaliwan ti disenyo ti bike lane ket saan a masayang ti pondo a nailatang para iti nasao a proyekto.
Mainaig iti daytoy, inbatad met ni Konsehal Bryan Alcid, ti Chairman ti Committee on Transportation ditoy ciudad ti Laoag a ti laeng gagem da iti balbaliw a pannakadisenyo ti bike lane iti By-pass road ket tapno maprotehiran dagiti motorista ken maliklikan ti desgrasya.
