LAOAG CITY – Suportado ni Dr. Alan Taylan ti panawagan nga i-veto ni Presidente Rodrigo Duterte ti vape bill gapo ta awan pulos ti pagsayaatan daytoy a lungalong.
Segun kenni Taylan, napaneknekan nga awan ti napintas nga ibunga wenno resulta ti panagusar ti vape kangrunaanen kadagiti ubbing.
Inlawlawag na nga amangan no arig na pagay-ayaman dagiti ubbing daytoy a makadadael iti salun-at da nangruna ket saan a chemical-free wenno adda ti ramen na a mabalin a makaperdi iti masakbayan da.
Mainaig iti daytoy, kunana a kadagiti nakaro ti panagsigarilyo iti regular a sigarilyo, ti vape ti us-usaren da tapno in-inot a maikkat daytoy a bisyo.
Nupay kasta, saan latta a napintas ti panagusar iti vape wenno e-cigarettes.
Kabayatanna, inadmitir ni Dr. Taylan a saan na a pulos a maawatan no apay a napununutan dagiti nangilungalong iti daytoy nangruna ti pannakipababa ti tawen ti mabalin nga agusar iti vape.
