LAOAG CITY – Ad-adalen ti Department of Energy (DOE), National Power Corporation (NAPOCOR) ken Aboitiz Power Corporation ti posible a panagpirma ti memorandum of understanding para iti nuclear energy development iti pagilian.
Basar iti Department of Energy, agbirok dagitoy dagiti lugar a posible a pakaipatakderan ti nuclear power plants.
Karaman kadagiti ikonkonsiderar ti Department of Energy ti saan a natuloy a Bataan Nuclear Power Plant nga inpasdek ti Marcos Sr. administration.
Ti plano a panagtipon ti puersa ket gagem a mapapigsa ti evidence-based ken adalen ti diskarte nga us-usaren iti sabali a pagilian para iti nuclear energy development a mabalin nga usaren ditoy Pilipinas.
Karaman ditoy ti panag-assess iti pakaipasdekan ti power plant, seguridad, regulatory readiness ken infrastructure requirements kas panangsurot iti International Atomic Energy Agency (IAEA) standards.
Ti panangikagumaan ti pagilian para iti panagsukisok iti natalged ken sustainable nuclear energy options ket paset ti long-term energy mix mangrugi inton 2032.
