LAOAG CITY – Nabagkong ti maysa a driver iti Barangay Cali iti ili ti Dingras.
Ti biktima ket agtawen ti 37 ken addaan ti live- in partner idinto a ti suspek ket agtawen ti 43, naasawaan, driver nga agpada dagitoy a residente iti nasao a barangay.
Basar iti Dingras Municipal Police Station, kabayatan nga agiinom ti biktima ken ti kabsatna ket kellaat nga adda ti saanda a panagkikinnaawatan a nangitunda ti panagririda.
Gapu iti daytoy, napan naganawa ti suspek ngem saan nga agpaanawa ti biktima gapu iti kinabartekna.
Mainaig iti daytoy, nagawid ti suspek iti pagtaenganda ken napan nangala ti knuckle knife ket ditoy a binagkongna ti biktima iti akinkannigid a siketna.
Naitaray ti biktima iti Dingras District Hospital ngem naiyakar iti Mariano Marcos Memorial Hospital and Medical Center para iti naan-anay a pannakatamingna.
Naammoan a narekobre dagiti otoridad ti knuckle knife nga inusar ti suspek iti insidente.
Kabayatanna, insigida a naarestar ti suspek ken nagtalinaed pay laeng iti pagbalodan a sumango iti maiyannatop a kaso.
