LAOAG CITY – Maisagsaganan ti kaso a Reckless Imprudence Resulting in Homicide kontra iti driver ti Ford Everest a nakadungpar iti tricycle a nakatayan ti driver na iti paset ti Barangay 3 iti ili ti San Nicolas.
Daytoy ti inbatad ni Police Major Eduardo Santos, ti chief of police iti ili ti San Nicolas.
Inbatad ni Santos nga iti agdama ket nagtalinaed iti kustodyar ti Philippine National Police ti driver ti Ford Everest a maysa a babai, addaan iti umno a tawen ken residente iti Barangay 5 iti ili ti San Nicolas.
Mainaig iti daytoy, kinumpirmaran ni Santos a ti pasahero ti tricycle ket asawa ti driver ken daytoy ket pito a bolan a masikog.
Iti agdama, under observation ti babai ngem conscious daytoy iti Black Nazarene Hospital iti ili ti San Nicolas.
Naamoan a ti Ford Everest ket mapan koma iti dakkel a mall iti ili ti San Nicolas idi napasamak ti insidente.
Immuna iti daytoy, bayat ti panagdaldalyasat ti tricycle iti paset ti Escoda Road, Brgy. 3 iti ili ti San Nicolas ket kellaat a dinungpar ti Ford Everest a maipagarop a napukawan ti preno.
Gapu iti panangdungpar ti Ford Everest iti tricycle ket naisadsad ti tricycle iti truck nga inturong ti taga Carasi.
Naitaray dagiti agasawa iti ospital ngem naideklarar ti lalaki a dead on arrival gapu kadagiti nakana a sinagaba na a sugat kangrunaan na ti ulo na.
