LAOAG CITY – Balligi a naisayangkat ti 50th Annual General Membership Assembly ti Ilocos Norte Electric Cooperative wenno INEC ita nga aldaw, Mayo 30.
Segun ken ni Mr. Cipriano Perry Martinez, General Manager ti Ilocos Norte Electric Cooperative, saan a nagbalin a nalaka ti panagtaray ti operasion ti kooperatiba iti panagtulid ti panawen gapu kadagiti nagduduma a karit ken pannubok.
Nupay kasta, inpasingkedna nga inkarigatan ti kooperatiba nga insigida a masolbar dagiti amin a parikot wenno arungaing dagiti member consumer-owners tapno saanen a dumakkel ken kumaro pay ti mapaspasaran a problema.
Inlawlawagna nga apaman a naan-anay daytoy a nagakem kas General Manager ti Ilocos Norte Electric Cooperative ket kagiddan iti panangawatna ti dakkel a responsibilidad ken panangipasigurado a nalaka ti presio ti kuryente iti intero a probinsia.
Mainaig iti daytoy, naragsak nga inpakaammo ni Atty. Nick Malasig nga iti baet ti mapaspasamak a gubat iti Middle East ket bimmaba ti kuryente ditoy probinsia maidasig kadagiti dadduma a kooperatiba.
Kabayatanna, nangipadanon ti virtual message ni Sen. Imee Marcos kagiddan ti 50th Annual General Membership Assembly ti Ilocos Norte Electric Cooperative.
