LAOAG CITY – Kinumpirmaran ni Police Major Joseph Baltazar, hepe ti PNP San Nicolas, a napasamak ti maysa a desgrasya iti Brgy. 12, Cayetano iti ili ti San Nicolas a pakairamanan ti maysa a motorsiklo ken kotse.
Binigbig ni Baltazar ti driver ti motorsiklo a ni Ruben Galang y Sampilo, residente iti Brgy. 55 Salet-Bulangon ditoy siudad ti Laoag idinto ti driver ti kotse a nagmaris iti gray ket ni Jeremy Sadiri Unday.
Kuna na a nagsagaba ti sugat iti ulo ni Galang ken dagus a naitaray iti ospital.
Segun kenni Baltazar, maipagarup a nataray ti motorsiklo a naggapu iti amianan ket dita a nadungpar na ti kotse nga agkurba nga agpaabagatan,
Basar iti palawag ti driver ti kotse, kuna ni Baltazar nga adda ti immuna a pinalabas na a lugan ngem idi agkurba ket gundaway a naidungpar ti motorsiklo iti akin kannigid a bumber ti kotse.
Rumrumwar nga agdardaras ti nakamotorsiklo nga agpaabagatan a direksiyon.
Agtultuloy ti imbestigasyon dagiti kameng ti PNP San Nicolas kalpasan ti desgrasya.
