LAOAG CITY – Naladingit ti pamilya ti driver ti motorsiklo kalpasan a pimmusay gapu iti napasamak a nakaam-ames a desgrasya iti Brgy. 16, San Marcos iti ili ti San Nicolas kabayatan ti pannakangilin ti Semana Santa wenno iti Biernes Santo.
Basar iti PNP San Nicolas, nagdinnungpar ti maysa a Honda RS 150 nga addaan ti plate number 0101-0707845 ken maysa Toyota Fortuner nga addaan ti plate number KGM96 iti akin laud a lane iti Manila North Road a sakop iti nasao a barangay.
Rumrumwar a face-to-face collision ti napasamak rason a dagus a naitaray ti driver ti motorsiklo nga agtawen ti 18, ken residente iti Brgy. 20, San Pablo iti Laoag City General Hospital ngem naideklara a dead on arrival.
Naamuan a napasamak ti desgrasya iti nasao a lugar gapu ta adda ti manarimaan a maar-aramid a box culvert iti akin daya a lane iti national highway a poon a nagsinnabat dagiti dua a lugan.
Kabayatanna, saan met a naan-ano ti sanga pamilya a nakalugan iti fortuner kalpasan ti desgrasya.
Agtultuloy pay laeng ti imbestigasyon dagiti otoridad kalpasan ti desgrasya.
