LAOAG CITY – Maysa a maipagarup a confidential agent ti National Bureau of Investigation (NBI) ti inarestar kalpasan ti napasamak nga insidente ti panagpinnutok ti paltog iti Senado idi rabii basar ken ni Senador Imee Marcos.
Ti nasao nga indibidual ket maipagarup a naarestar kalpasan nga innalana ti tactical bag a nabati iti agdan ti maikadua a kadsaaran ti pasdek ti Senado no sadinno a nangngegan dagiti putok ti paltog.
Saan pay a naiparuk-at ti pakabigbigan ti maitudtudo a National Bureau of Investigation personnel ken no asino ti mismo a nangarestar kenkuana.
Nupay kasta, inpetteng ti Senadora, inbatad ti nasao nga indibidual a ti boss-na ket maysa nga “Atty. Bomediano” ti National Bureau of Investigation-Organized and Transnational Crime Division (NBI-OTCD).
Kuna pay ti maitudtudo nga agent, ti superior-na ti nangibilin iti operasion nga adda ti pakainaiganna iti panangarestar ken ni Senador Ronald ”Bato” dela Rosa a sumangsango iti arrest warrant manipud iti International Criminal Court (ICC).
Inallukoy ni Sen. Imee ni Bomediano nga agpalawag maipanggep iti napasamak a riribok iti Senado a nagtungpal iti lockdown ken panagpinnutok ti paltog.
Kabayatanna, immunan a naglikudan ni National Bureau of Investigation Director Melvin Matibag nga awan ti kameng ti ahensiada a naipatulod iti Senado maisupadi iti rakurak ti senadora.
