LAOAG CITY – Inbatad ni Bureau of Corrections (BuCor) Director General Gregorio Catapang Jr. a saan a posible a mapasamak ti panaglambitin iti drone tapno maitakas ti maysa a nakabalud.
Daytoy ket kalpasan ti panagwaras iti publiko ti maipagarup maysa a plano a panangitakas ti maysa a nakabalud a Koreano ditoy Pilipinas usar ti maysa a drone.
Mainaig iti daytoy, inpetteng ni Catapang a maipawil ti agpatayab ti drone iti asideg ti pasilidad ti Bureau of Corrections (BuCor) ken no man pay adda manggandat nga agpatayab ket segun iti opisial, insigida daytoy a mapansin dagiti otoridad ken dagiti security system-da.
Innayonna pay ti kinaadda ti nagduduma a CCTV camera iti aglawlaw ti correctional facility tapno mamonitor dagiti otoridad ti aglawlaw ti pagbaludan.
Idi laeng kallabes, naipakaammo iti publiko ti maipagarup kalikagum ni Park Wang-yeol a tumakas iti pagbaludan.
Nupay kasta, impasigurado ti Department of Justice (DOJ) a kumpleto ti ramit ti Bureau of Corrections (BuCor) tapno maliklikan ti aniaman a plano dagiti nakabalud kas iti panagusarda ti drone.
