LAOAG CITY – Kinumpirmaran ni DSWD spokesperson Irene Dumlao, a nakaibunongen ti ahensya kadagiti nayun a family food packs kadagiti naapektaran ti Bagyo Ulysses.
Inbinsa-binsa na dagiti lugar a naikkan ti ayuda kas iti 1,000 family food packs ken kits iti Brgy. Silangan, Quezon City, 1,400 family food packs iti Marikina City, 2,000 family food packs iti San Mateo, Rizal; 3,300 iti Legazpi, Albay; 1,700 iti Camarines Norte, 1,000 iti Urdaneta City, iti Region 2 ken Region 3 babaen ti National Resource Operation Center ti DSWD.
Iti ekslusibo a pannakiuman ti Bombo Radyo Laoag kenni Dumlao, agtultuloy ti repacking kadagiti ayuda iti National Resource Operation Center tapno masigurado nga adda ti makaanay a relief goods para kadagiti naapektaran a residente.
Inbatad na a sakbay pay iti iduduprak dagiti naglabas a bagyo ket nakasaganan ti ahensya ken nakikoordinar da iti Philippine Coast Guard, PNP ken dadduma pay tapno alisto a maidanun ti tulong kadagiti residente.
Kabayatanna, inpasingked ni Dumlao a nasurot ti minimum health standards tapno masigurado dagiti residente a natalged da manipud iti COVID-19, contact monitoring, case investigators ken dadduma pay a makatulong iti proteksiyon dagiti maseknan.
Innayon ni Dumlao nga adda ti makaumanay a pondo ti DSWD para iti disaster response operation kalpasan a nareplenish ti quick response fund nga umabot iti 888 a milyon a pisos ken ti stock pile ket umabot iti nasurok 600 a milyon a pisos wenno agdagup iti nasurok 1.4 a bilyon a pisos.
