LAOAG CITY – Kinumpirmaran ti Department of Social Welfare and Development nga umaboten iti pakabuklan a 7.9 milyon a tattao ti apektado ti naglabas a bagyo Kristine ken Super Typhoon Leon iti pagilian.
Iti datos ti Department of Social Welfare and Development – Disaster Response Operations Monitoring and Information Center, umaboten iti 65,261 a pamilya katukad ti 250,000 nga indibidual ti nagtalinaed kadagiti evacuation areas.
Adda metten ti pakabuklan nga 434,000 a tattao ti nairekord a nagbakwit ken nagtalinaed iti agdama kadagiti kabagyan ken papagayam da.
Gapu iti kinapigsa dagiti tudo a gubuay ti dua a bagyo, umabot iti 7,914 a balay ti totally damage idinto a 84,000 ti partially damaged.
Inpasigurado met ti ahensya nga agtultuloy ti panangipaay da ti tulong kadagiti naapektaran ti dua a bagyo.
Nakaipaay metten ti nasurok nga ₱635-million a balor ti relief resources ti Department of Social Welfare and Development iti tulong dagiti lokal a gobierno ken Non-governmental organization.
