LAOAG CITY – Adda dagiti residente a naggandat nga aglibas manipod iti Sitio Dungtal iti Brgy. 23 ditoy siudad ti Laoag.
Daytoy ti kinumpirmaran ni PLt. Col. Rafael Lero, ti chief of police iti PNP-Laoag.
Segun kenni Lero, naaktuan dagiti kameng ti PNP ti maysa a miembro ti LGBT ken maysa a babai a gandat da ti aglibas.
Inbatad na nga iti taltalon ti nagnaan dagiti maseknan nu sadino a nakalugan da iti motorsiklo.
Gapu iti daytoy, sinita da dagitoy ngem ti laeng miembro ti LGBT ti natiliw da idinto a ti kadua na a babai ket nakalibas.
Immuna iti daytoy, kuna ni Lero nga inbaga dagiti opisyal ti barangay nga adda ti madmadlaw da a magmagna iti taltalon tapno makaruar iti nasao a sitio.
Kuna na a nangideploy a dagus kadagiti pulis tapno agbantay iti nasao a lugar isut gapu na a naaktwan da met ti panaglibas dagiti dua a residente.
Maipalagip a naipan iti lockdown ti intero a Sitio Dungtal kalpsan a kaaduan kadagiti aktibo a kaso ti covid-19 ditoy probinsya iti agdama ket residente iti nasao a sitio.
Kabayatanna, nagtalinaed iti kustodyar ti PNP ti miembro ti LGBT bayat a maisagsagana ti kaso a panagsalungasing iti Article 151 iti Revised Penal Code ken ti Sec. 9 ti RA 11332 wenno ti Mandatory Reporting of Notifiable Diseases and Health Events of Public Health Concern Act idinto nga agtultuloy ti pannakabirok ti nakalibas a babai.
