LAOAG CITY – Nadismaya ni Kilusang Mayo Uno Secretary General Mary Anne Castillo idi naammoanna a maipagarup a pinalibasda ni Senador Bato dela Rosa iti pasdek ti Senado.
Inbatad ni Castillo nga arig tinulungan dagiti dadduma a senador ni Dela Rosa banag a nasken met a mapagsungbat dagitoy iti linteg.
Kabayatanna, naiget met a kinondenar ti Bagong Alyansang Makabayan gapu ta mangipakpakita daytoy iti panaglabsing iti pannakagun-od ti hustisia.
Segun iti grupo, saan laeng a senado ti rumbeng a mapagsungbat iti napasamak no diket pakairamanan ti agdama nga administrasion gapu iti maipagarup a nabayag a tignay tapno mapagsungbat ni Dela Rosa iti reklamo a sangsangoen iti International Criminal Court mainaig iti extrajudicial killings.
Inpetteng pay dagiti grupo nga arig adda ti prebilehio dagiti tattao a nakatugaw iti puesto gapu ta no dagiti marigrigat ti nagbasol ket insigida a maibalud a saan a kapada kadagiti nabibileg a tattao.
