LAOAG CITY – Natiliw dagiti tallo a lallaki gapo iti iligal a panagsusugal da iti Brgy .6 iti ili ti San Nicolas.
Segun iti Philippine National Police iti ili ti San Nicolas, karaman kadagiti natiliw ket dua a senior citizen nga agtawen ti 62 ken 67 ken maysa nga agtawen ti 48, agpapada a residente iti nasao a barangay.
Inbatad ti pulisya nga adda ti naawat da a report seknan iti iligal a panagsusugal rason a dagus a nagturong dagiti otoridad ti nasao a lugar.
Basar iti naisayangkat nga operasyon ti Philippine National Police, natiliw dagiti tallo a lallaki iti maysa a pagtaengan kabayatan ti panagay-ayam da iti tong-its.
Inabatad pay ti PNP San Nicolas a naala manipod kadagiti suspek ti maysa a set ti baraha, tallo a bangko, maysa a lamisaan ken kwarta.
Iti agdama, ada iti kustodyar iti Philippine National Police San Nicolas dagiti suspek ken manamnama a sumango iti kaso a panaglabsing iti PD 1602 wenno Illegal gambling.
