LAOAG CITY – Inarestar dagiti otoridad ti dua nga indibidual gapu iti illegal a panagpukan ti kayo iti ili ti Pagudpud.
Daytoy ti inbatad ni Police Capt. Beejay Caliboso, ti Officer-In Charge iti Philippine National Police iti ili ti Pagudpud.
Binigbig na dagiti suspek nga isuda Jimmy Damaso Pitlongay, agtawen ti 52, naasawaan, mannalon, ken ni Jay Ortega Abogan, agtawen ti 42, naasawaan, mannalon, agpada dagitoy a residente iti Barangay Pancian iti nasao nga ili.
Inlawlawag ni Caliboso nga adda ti naawat da nga impormasyon nga adda ti illegal nga agpukpukan ti kayo iti kabanbantayan a paset ti Barangay Pancian ket insigida da a nagresponde kadwa da dagiti personnel ti Department of Environment and Natural Resources ket ditoy a naaktwan da dagiti suspek a manarimaan ti panagikarga da kadagiti naririt a kayo ti laoan iti kurung-kurong da.
Segun ken ni Caliboso, adda ti 23 a lumber nga addaan ti pakabuklan a 112 board feet ti nakumpiskar da iti nasao nga operasyon.
Innayon na nga awan ti permit dagiti suspek nga agpukan ti kayo ken saan pay a nakaehistro ti inusar da a chainsaw.
Gapu iti daytoy, manamnama a sumango dagiti suspek iti kaso a panaglabsing ti Republic Act 9175 wenno panagusar ti saan a rehistrado a chainsaw ken ti illegal a panagibiyahe dagiti napukan a kayo iti sabali a lugar.
